احمد نجمممممممممم اصحى

اصحي يا مصر

اصحي يا مصر

هزي هلالك

هاتي النصر

كوني يا مصر وعيشي يا مصر

مدّي إيديكي

وطولي العصر

اصحي وكوني وعيشي يا مصر



اصحى يا عامل مصر يا مجدع

وافهم دورك

في الوردية

مهما بتتعب

مهما بتصنع

تعبك رايح

للحرامية

جهدك عملك

رزق عيالك

عرقك مرقك

ولا يهنا لك

اصحى يا عا مل

غير حالك

صون المصنع

واصنع مصر

اصحي وكوني وعيشي يا مصر



اصحى يا زارع مصر الخضرا

قُدرة وخُضرة

ونور وجمال

ابدر غيطك

واحمي البدرة

ضد الآفة

والاستغلال

أرضك عرضك

باب الدار

صبحوا مداسة

للسمسار

نعطش

ولا نشربش عكار

وصفة قالوها الحكما يا مصر

اصحي وكوني وعيشي يا مصر



واصحى يا جندي

يا تار الشهدا

عمي وخالك

أختي واخوك

لجل ما تهدا وتارك يهدا

فرّغ نارك في اللي خانوك

يا ابن الشعب يا حامي الشعب

إنت أملنا في يوم الصعب

اصحى يا جندي ودقّ الكعب

حرّر مصر وطهّر مصر

اصحي وكوني وعيشي يا مصر